ROXAS CITY – Ginsungka sang isa ka mayoralty candidate sa Capiz ang iya mga armas sa estasyon sang pulisya.
Ini ang ginkompirmar ni Police Captain Armando Clavaton, hepe sang President Roxas PNP sang mainterview sang Bombo Radyo Roxas.
Personal nga nagpadulong si incumbent Mayor Receliste Escolin sa President Roxas Municipal Police Station agud iturn-over ang iya mga armas.
Ang nasambit nga mga armas ang ginalakipan sang isa ka M16 armalite rifle nga loaded sang 17 ka mga bala kag duha ka unit sang calibre .45 nga armas nga lunsay loaded sang tag-walo ka mga bala.
Suno kay Clavaton, ginsungka sang nasambit nga alkalde ang iya mga armas bangud napaslawan ini nga maka-renew sang iya nga lisensiya.
Ginkalipay naman ni Clavaton ang nasambit nga tikang sang alkalde kag nagalaum nga pamarisan ini sang iban pa nga mga gunowners nga wala sang nagakaigo nga dokumento.
