Pilas ang naangkon sang isa ka menor de edad matapos ginluthang sa Barangay Malonoy, Dumarao, Capiz.
Ang biktima amo ang menor de edad nga lalaki samtang ang ginapahayag suspek 40-anyos nga lalaki kag lunsay residente man sang nasambit nga lugar.
Sa nangin interview sang Bombo Radyo kay PCMS. Ronald Bacong, hepe sang Dumarao MPS, ginpahayag nga samtang naga-inom-inom ang nasambit nga suspek naglabay ining biktima kag ginkumpronta ini sang suspek.
Ginaalegar nga imbolbado ang nasambit nga biktima sa pila ka mga kinawatay sa lugar kag sadto nga tinion nadulaan ining suspek sang butang kag ang ginatumod kag ginadudahan amo ang nasambit nga biktima.
Bangud sa kaingit wala sang pagpangduha nga nagbunot sang armas-luthang ang suspek kag gintiro ang biktima nga naigo sa wala nga porsyon sang lawas.
Gilayon naman nga ginrespondihan sang Dumarao Emergency Response Team ang biktima kag ginpadangat sa pinakamalapit nga ospital para sa nagakaigo nga pagbulong.
Samtang, boluntaryo naman nga nagsungka ang nasambit nga suspetsado sa mga kapulisan.
Sa karon, ginahulat nalang ang desisyon sang pamilya sang biktima kun magapasaka ini sang kaso sa nasambit nga suspetsado.
