PILAR CAPIZ – Pilas sa magkatuhay nga parte sang lawas ang naangkon sang menor de edad nga lalaki, matapos aksidente nga nabungguan sang ambulansya sa bahin sang National Highway sang Barangay Dulangan, Pilar Capiz.
Ang wala na ginhingadlan nga biktima ang nagapang-edaron sang 12-anyos, kag residente sang Barangay Agtalin sa amu nga lugar samtang ang driver naman sang ambulansya ang ginkilala kay alyas “Arnold”, 55-anyos kag residente sang Barangay Dulangan sa amu nga banwa.
Sa impormasyon nga nakuha sang Bombo Radyo nagikan sa Pilar Municipal Police Station, ginapahayag nga samtang ginasubay sang driver sang ambulansya ang dalan nagikan sa syudad kag padulong kun tani sa amu nga banwa, pag-abot sa lugar ginapahayag nga nag-una ang ambulansya sa nagapondo nga truck apang lipod sa ihibalo sang driver sini nga may yara sang traysikol sa una nga bahin sang truck nga nagapapanaog sang iya pasahero.
Suno diri nga hinali lamang nga nagtabok ang biktima nagikan sa traysikol kabangdanan nga aksidente ini nga nabungguan sang ambulansya.
Bangud sini, madasig nga ginrespondihan sang katapo sang Municipal Disaster Risk Reduction and Management Office ang biktima kag gilayon nga ginpadangat sa Bailan District Hospital para sa nagakaigo nga pabulong apang natigayon naman ini nga gin-transfer sa isa ka pribado nga ospital sa syudad.
Sa karun, nagapabilin sa kustodiya sang Pilar MPS ang driver sang ambulansya para sa nagakaigo nga disposisyon.
