ROXAS CITY – Tuman ang paghinulsol sang suspek nga isa ka menor de edad nga ginkilala kay John Peter Obarra, 17-anyos kag residente sang Barangay Balat-an, Mambusao, Capiz angut sa pagbuno-patay sini sa public-school principal nga si Jun Mencedez.
Ini ang ginkumpirmar ni PLt.Col Aron Palomo, Hepe sang Roxas City PNP sang mainterview sang Bombo Radyo.
Suno diri, boluntaryo nga nagsungka ang suspek kag gindakop sang kapulisan sa iya mismo puluy-an sa nasambit nga Barangay.
Wala paman gintuad sang suspek ang iya motibo sa pagpatay apang suno kay hepe ginapahayag nga wala gin-ekspektar ni Obarra kag madasig ang natabo, nagapangayo man ini sang pasaylo sa iya ginhimo.
Sa inisyal nga imbestigasyon sang kapulisan, dako ang posibilidad nga dugay na magkilalahay si Obarra kag Mencedez bangud makapila ka beses naman ini nakakadto sa apartment sang biktima kag ginhagad lamang ini sang abyan sang biktima nga si Alvin Aniero nga mag-inom didto.
Dugang pa ni Palomo nga subject for verification pa ang live birth ni Obarra agud mapamatud-an kun menor de edad pa siya kag magaselebrar kuntani sang iya ika-18 nga kaadlawan sa Agosto 31 sini nga tuig.
Sa karon, yara sa pag-inakop sang Women and Children’s Protection Desk (WCPD) ang suspek kag magapaidalom sa validation sang City Social Welfare and Development Office (CSWDO) agud madeterminar kun naintindihan sini ang iya ginhimo.
Magapangatubang sa kaso nga homicide si Obarra kag posible murder depende sa resulta sang pagtuon sang CSWDO.
Gintul-id sang hepe nga nagmandu si Mayor Ronnie Dadivas kaina sang aga nga padasigon kag tinguhaan ang pagsolbar sang kaso agud mahatagan sang hustisya ang principal.
Dako ang pagpasalamat sini sa iya kaupdanan sa Roxas City PNP, Mambusao PNP, sa Brgy. Kapitan sang Balat-an kag sa iban pa nga nagbulig sa madasig nga pagdakop sa nasambit suspek.
