Iga-award sa bug-os nga coaching staff sang Meralco Bolts ang Baby Dalupan Coach of the Year award sa 30th PBA Press Corps Awards Night subong nga gab-i sa Novotel Manila Araneta City.
Ini ang bangud sa pag-angkon sang Bolts sa kauna-unahan nila nga PBA championship matapos piyerdihon ang San Miguel sa nakaligad nga Philippine Cup Finals.
Ang Meralco coaching staff ginapamunuan ni head coach Luigi Trillo kabulig sanday active consultant Nenad Vucinic kag deputies Gene Afable, Reynel Hugnatan kag Sandro Soriano kaupod si consultant Norman Black.
Nauna na nga naangkon ni Trillo ang nasambit nga pagkilala nga ginpangalan sa ginakabig nga ‘Maestro’ sang Philippine basketball nga si Virgilio ‘Baby’ Dalupan sadtong 2012-13 season sang giyahan niya ang Alaska franchise sa ila nga ulihi nga PBA title sa Commissioner’s Cup.
