Isa ka makatilingala nga hitabo sa baybayon sang Scotland pagkatapos nga ang isa ka tawo nakakita sang “Message in a bottle” nga naghalin sa Canada.
Si Mike Scott, samtang nagalakat upod sa iya mga ido sa baybayon sang St. Cyrus, sa South Aberdeen, nakakita siya sang isa ka botelya. Natalupangdan ini sang iya Labrador retriever nga si Maggie. Sa sulod sang botelya may letra nga ginbutang sa plastic para indi mabasa sang tubig.
Ang sulat, nga ginsulat sa linggwahe nga Pranses kag napetsahan sang Agosto 2024, ang ginlunsyar gikan sa isa ka ferry nga nagabiyahe halin sa Prince Edward Island pakadto sa Îles-de-la-Madeleine sa Quebec.
Ang manunulat nga si Annie Chaisson, nagpangabay nga ang bisan sin-o nga makakita sang botelya makig-angot sa iya paagi sa Facebook.
Suno kay Scott, nakita sang iya asawa ang Facebook profile nga ginapatihan iya ni Chaisson, apang wala pa sila sang may nabaton nga sabat. Wala man sang bag-o nga aktibidad sa profile, gani posible nga indi na aktibo sa social media ang tag-iya sang sulat.
Indi ini ang una nga tion nga ang isa ka mensahe sa isa ka botelya nagtabok sa Atlantiko. Sang nagligad nga tuig, ang isa ka botelya gikan sa Bell Island, Newfoundland, nga napetsahan Septyembre 12, 2012, nakit-an man sa Dingle Peninsula, Ireland, sang Hulyo 2025, kapin sa isa ka dekada pagkatapos ini nga ginlunsyar.
