ROXAS CITY – Nagapati si Provincial Veterinarian Dr. Leonel Abordo nga iligal ang pagpasulod sang mga baboy sa probinsya sang Capiz.
Sa pagpakig-angut sang Bombo Radyo kay Dr. Abordo, ginpahayag sini nga base sa ila nakuha nga impormasyon, duha ka dako nga pumpboat ang nagdungka sa Brgy. Banica kag ginabulubanta nga sakay ang 80 tanan ka mga baboy nga nagikan sa probinsya sang Bohol.
Maathag suno diri nga iligal ang pagpasulod bangud gab-i na ini nagdungka kag wala pa sang nagakaigo nga permit.
Pahayag pa ni Abordo nga sala ang permit destination sang mga baboy bangud naka-address ini sa Ibajay, Aklan kag diri pa lang makitaan na sang bayolasyon.
Dako man ang pagpati sini nga nabaligya na ang amo nga mga baboy nga posible naglapta na sa mga kabanwahanan kag ginpaguwa lamang nga sa Aklan pagadal-on.
Aminado man ini nga ang amo nga nagakatabo ang isa man sa rason kun ngaa dugay madula ang ASF sa probinsya.
