ROXAS CITY – Padayon ang monitoring sang Provincial Disaster Risk Reduction and Management Office, Aksyon Tabang sa mga barangay sa probinsiya sang Capiz nga apektado sang pagbaha tuga sang malain nga lakat sang panahon.
Sa interview sang Bombo Radyo Roxas kay Mr. Espiridion ”Speed” Pelaez, action officer sang PDRRMO, Aksyon Tabang, ginpahayag sini nga naglab-ot na sa 20 ka barangay ang apektado sang pagbaha sa lima ka mga banwa sa probinsiya.
Indi pa maagyan sang anuman nga sahi sang salakyan ang Barangay Bangon Bangon kag Cogon sa banwa sang Sigma bangud sa tubig baha nga nagalab-ot na sa mga karsada.
Samtang nagdugang ang mga ulumhan nga ginbaha kalakip na diri ang banwa sang Sigma, Panit-an, Cuartero, Dumalag kag Mambusao.
Suno kay Pelaez nga posible indi na madugangan pa ang numero sang mga apektado nga barangay bangud nagsilak na ang adlaw kag wala na nag-ulan humalin kaina sang aga.
Apang nakaalerto sa gihapon kag nakastandby ang PDRRMO kag Capiz Emergency Response Team (CERT) kag tanan nga responding agencies kasubong sang PNP, BFP, PCG kag Philippine Army para sa posible nga deployment.
