ROXAS CITY – Ginahikutar na sang mga biktima sang illegal recruitment ang pagpasaka sang panumbungon batuk sa illegal recruiter nga si Ramilyn Andrade sang Barangay Bolo, Roxas City kag live-in partner sini nga si Kim Tae Hyeong.
Suno kay Doroteo Laforteza, isa sa mga biktima nga dako ang ila pagpasalamat sa Capizeño nga si Atty. Nelson Borja bangud sa iya bulig nga mahikutar ang nagakaigo nga papeles agud makapasaka sang panumbungon batuk sa duha.
Samtang nahibaluan ni Laforteza sa kaupod sini nga biktima nga may kaupod si Andrade sa pagpangrecruit nga ginkilala kay Jessie Aguilar nga nagatudlo sang Korean language nga naba-se sa business center.
Suno kay Doroteo nga mismo si Aguilar ang nagapangkolekta sang bayad nagikan sa mga biktima.
Sa karon luyag lamang sang mga biktima nga mabalik ang ila kwarta nga ginbayad kay Andrade kag Aguilar.
