ROXAS CITY – Padayon nga nadugangan ang numero sang mga na-biktima sang FOREX investment scheme sa probinsiya sang Capiz.
Mahibaluan nga sunod-sunod nga nagdangop sa estasyon sang pulisya ang mga biktima agud ipalab-ot ang kapaslawan sang nag-recruit sa ila nga mabalik ang ila gin-invest nga kwarta.
Sa karon, nagalab-ot na sa 58 tanan ka mga professionals ang nagpabalhag sa estasyon sang pulisya nga nabiktima sang nasambit nga investment scheme.
Ginatudlo nga recruiter ang anay empleyado sang Bureau of Internal Revenue (BIR) nga si Lourdes Baarde, 41 anyos sang Barangay Baybay, Roxas City.
Mahibaluan nga kadamuan sa mga investor ang lunsay mga negosyante, empleyado sang gobyerno kasubong sang Department of Education, Philippine National Police, Local Government Unit, mga hospital staff kag may yara man sang nagatrabaho sa private sector.
Mahibaluan nga may pila ka mga investors nga nagalab-ot sa 2.7 million pesos ang na-invest nga kwarta samtang nagalab-ot naman sa P100, 000 ang may pinakamanubo nga investment.
Nagganyat nga mag-invest sang kwarta ang mga miyembro bangud sa ginatanyag nga 20 percent nga interest kada bulan pinaagi sa pag-isyu sang post-dated check.
Apang wala nagsunod sa ila nga memorandum of agreement (MOA) si Baarde kun sa diin wala sang may nabaton nga return of investment (ROI) ang mga biktima kag nataban man sang suspek mangin ang ila nga kapital.
