ROXAS CITY – Wala pa man nagsugod ang bulan sang Nobyembre para sa implementasyon sang full face-to-face classes, may masobra 40% na ka mga buluthoan sa idalom sang Capiz Division ang nagpatigayon sini.
Sa interview sang Bombo Radyo kay Dr. Miguel Mac Aposin, Division Superintendent sang DepEd Capiz, iya ginpahayag nga ang mga nasambit nga buluthoan ang nakapreparar kag nakapasar sa assessment sang IATF, DOH kag DepEd.
Suno sa doktor, mahimo magpatigayon ang isa ka buluthoan sang full f2f class kun preparado ilabi na kun bastante ang kagamitan kag manunudlo.
Ginpahayag nga makabig transition period ang bulan sang Setyembre kag Oktubre bilang paghanda sa full f2f classes sa Nobyembre.
Nagalab-ot naman sa 95-100% ang attendance sang mga estudyante, nagapakita ini suno diri sang ila excitement nga makabalik sa eskwelahan.
Samtang, ang buluthoan naman ang nagadeterminar sang ila modality kun magapatigayon sang full f2f ukon blended learning.
Kaangut diri, kun magsugod na ang full f2f class kag mag-request ang ginikanan nga magpabilin sa modular ukon online learning, magadepende naman ini sa sitwasyon ukon kahimtangan sang bata kag ila pa ini pagatun-an.
Ginklaro sa liwat ni Aposin nga wala naga-require ang DepEd sa pagsuksok sang uniporme, ang importante nga makasulod sa klase ang bata.
Dugang sini, indi pagastriktuhan ang kahabaon sang buhok sang estudyante apang suno diri mas maayo nga magtambong sa meeting ang mga ginikanan kaupod ang mga manunudlo agud magkasugot sa kaayuhan sang bata ilabi na pag-abot sa proper grooming nga kabahin man sa formation sang ila pagdalagko.
Ginapangabay ni Doctor Aposin sa tanan ilabi na sa ginikanan nga magkooperar sa mga manunudlo kag school heads para sa padayon nga katawhayan sang klase kag preparasyon sa full face to face classes sa palaabuton nga Nobyembre 22, 2022.
