ROXAS CITY, CAPIZ – Padayon nga nagataas ang numero sang mga estudyante nga naga-enroll sa mga eskwelahan sa Western Visayas para sa School Year 2025-2026.
Sa interview sang Bombo Radyo Roxas kay Mr. Hernani Escullar Jr., Spokesperson sang Department of Education (DepEd) Region 6, iya ginpahayag nga naglab-ot na sa masobra isa ka milyon ang kabug-usan nga numero sang mga enrollees sa rehiyon.
Suno kay Escullar, daku ang nangin pagtaas sa numero sang mga estudyante subong nga tuig kun ikumparar sa mga nakaligad nha school year.
Pinakamadamo sa mga nagpalista ang gikan sa mga pampubliko nga eskwelahan sa bug-os nga rehiyon, kalakip ang mga probinsya sang Iloilo, Capiz, Aklan, Antique, Guimaras, kag Negros Occidental.
Dugang pa sang natungdan, ginalauman nila nga magadamo pa ang mga enrollees sa mga masunod nga adlaw.
Ginpanugyanan naman sang DepEd ang mga ginikanan kag guardian nga indi na paghulaton ang ulihi nga adlaw sang enrollment agud makalikaw sa kasukuon kag mapreparar ang ila mga anak sa klase.
Ginpasiguro man sang ahensya ang bastante nga classroom, manunudlo, kag learning materials para sa tanan nga mga estudyante sa rehiyon.
