ROXAS CITY – Nagakaubusan na sang stocks sang school supplies ang pila ka mga establisyemento sa syudad.
Ini ang ginkumpirmar ni alyas “Joleen”, Sales Lady sang isa ka establisyemento sa Roxas City sang mainterview sang Bombo Radyo.
Suno diri, tuman kadahog subong ang mga gamit pang-eskwela bangud man sa palaabuton nga Lunes na ang pagbukas sang klase ukon limited face-to-face classes.
Ginsiling ni Joleen nga wala nag-ekspektar ang iya amo nga magadagsa ang bumalakal kun sa diin ginkaubos man sang ila stocks ilabi na sang notebook kag ballpen, lain sang pandemya nga halos wala na may nagabakal sa ila.
Ginpat-od man sini nga nagpataas sila sang presyo depende sa brand sang school supplies kag P3 ang pinakamataas nila nga gindugang.
Sa karon, mabakal sa P17 ang ila ginabaligya nga notebook, P15 ang papel sang Grade 1-3, P22 naman ang intermediate pad, kag P8-10 ang ballpen.
