DUMARAO, CAPIZ- Nagapadayon sa karon ang pagpaubra sang duha ka mga flood control projects sa subong nga tuig sa banwa sang Dumarao, Capiz.
Sa interview sang Bombo Radyo kay Mayor Mateo Hachuela sang nasambit nga banwa, iya ginpahayag nga may yara sa karon sang on-going nga proyekto partikular sa Barangay Poblacion Ilaya kag Barangay Poblacion Ilawod. Sa diin suno sa iya nga ginsuguran sang Marso 26 sa sini nga tuig ang sa Poblacion Ilaya, kag sang Hunyo 6 naman ginsuguran ang sa Poblacion Ilawod.
Dugang pa sini, may yara naman sang natapos na nga proyekto nga flood control nga wala nakitaan sang kun ano man nga anomaliya kag kapalpakan sa diin nahamtang ini sa Barangay Tinaytayan nga nagabalor sang P71M.
Nahibaluan nga ang pondo sang amo nga mga proyekto ang nagikan sa National Government pamaagi sa Department of Public Works and Highways (DPWH).
Pahayag pa ni Hachuela, dako nga bulig ang amo nga proyekto bangud nga napahagan-hagan ang kaso sang pagbinaha sa ila nga lugar subong man ang pagtiphag sang duta sa pila ka bahin nga malapit sa suba.
Samtang, ginsiguro naman ni Hachuela nga ma-implementar sang maayos ang amo nga mga proyekto sa diin nga mabenepisyuhan gid sang tagsa ka mga pumuluyo sa banwa sang Dumarao.
In an interview with Bombo Sunnie Mae Constantino Batencila
