Nagpahanumdom ang Roxas City Veterinarian sa publiko sang posible nga mga sakit nga mahimo makuha sang mga hinuptanan nga kasapatan bangud sa tuman nga init sang adlaw.
Sa interview sang Bombo Radyo kay Dr. Leah Ingalla, city veterinarian, iya ginpahayag nga ang sobra nga init sang adlaw mahimo makaapekto sa mga kasapatan.
Suno kay Ingalla, posible nga ma-heatstroke ang mga sapat kag makabatyag sang dehydration ukon kakulangan sa tubig sa lawas.
Dugang pa sini, nga nagataas man ang risgo sang mga sakit pareho sang parasites kag garapata, pati na ang “cat worm” kag myiasis.
Ang myiasis amo ang kondisyon nga ginatamnan sang itlog sang langaw ang panit ukon pilas sang sapat, samtang ang “cat worm” amo ang klase sang bulate.
Agud malikawan ang amo nga balatian, ginpahanumdom sini nga dapat ibutang ang mga hinuptanan nga mga sapat sa mahanginan kag mahawan nga lugar kag siguruhon nga may yara permi sang sapat nga tubig.
