ROXAS CITY -Kinahanglan nga magpa-miyembro sa kooperatiba ang mga jeepney drivers kag operators agud makakuha sang special permit para makabiyahe sa siyudad sang Roxas kag probinsiya sang Capiz.
Ini ang ginpahayag ni Leslie Angeles, Panay Island Transport Cooperative – Manager sang ma-interview sang Bombo Radyo.
Suno kay Angeles nga ang mga jeepney drivers kag operators nga may yara sang accreditation letter gikan sa Office of Transportation Cooperative (OTC) ang sarang mabuligan sang opisina nga makakuha sang special permit sa Land Transportation Franchising and Regulatory Board (LTFRB).
Ginkasubo ni Angeles nga ang jeepney operators kag mga drivers nga wala sang may nauyutan nga mga accreditation letter gikan sa (OTC) ang indi mabuligan sang opisina nga makakuha sang special permit.
Samtang ginklaro man sini nga indi mabuligan nga maproseso sang opisina ang pila ka mga jeepney drivers kag mga operators nga ginahinyo ni City Mayor Ronnie Dadivas nga mahatagan sang special permit agud makabiyahe sa siyudad.
Suno kay Angeles nga tuman ka strikto ang pagsulundan sang LTFRB pag-abot sa pagkuha sang special permit kun sa diin indi mahimo mahatagan ang mga wala na-accredit sang (OTC).
Sa karun may yara na sang 35 ka mga Public Utility Jeepney’s (PUJ’s) kag 15 ka mga UV express nga nagabiyahe sa syudad kag probinsiya matapos nga nakakuha sang special permit gikan sa LTFRB kun sa diin ini ang may biyahe nga Adlawan, Bolo, Lonoy, Loctugan, Ivisan, Sapian, Dumalag kag Pontevedra.
