Nagpabutyag ang National Police Commission (NAPOLCOM) sang ila mataas nga pagkilala kag pagdayaw sa ‘maximum tolerance’nga ginpatuman sang mga tinawo sang Philippine National Police (PNP) nga nagserbe bilang guwardya kag naghatag sang seguridad sa massive protest actions nga ginhiwat sa nagkalain-lain nga bahin sang pungsod sang nagligad nga semana, partikular sang Setyembre 21.
Paagi sa isa ka pormal nga pahayag, ang NAPOLCOM nagpabutyag sang sinsero nga pagpasalamat sa dedikasyon kag serbisyo sang mga katapo sang kapulisan sa pag-amlig sa mga indibidwal nga nagpasakop sa aksyon protesta, bisan pa nga sa sina nga tion ang iban sa ila ginbutang sa posible nga katalagman kag pamahog sa ila kaluwasan.
Ginkilala sang komisyon ang importansya sang papel sang PNP sa pagsiguro sang seguridad sang tanan.
Naghatag sang pagpasidungos si NAPOLCOM Vice Chairman kag Executive Officer Commissioner Rafael Calinisan sa tanan nga kapulisan nga nagpakita sang kalig-on kag commitment sa ila mga katungdanan, kag padayon nga nagaserbisyo nga wala sang hinalung-ong agud mapabilin ang kalinong kag kaluwasan sang publiko sa pihak sang mga pagpanghangkat.
Suno kay Commissioner Calinisan, ini nga mga hitabo nagapakita sang matuod nga sakripisyo kag dedikasyon sang tagsa ka pulis sa ila ginsumpaan nga katungdanan. Ang ila pagpursigi kag pagserbisyo sa pungsod nagapakita sang ila pagpalangga sa Pilipinas kag sa pumuluyong Pilipino.
