Nagpalab-ot sang reklamo ang mga mangunguma sang barangay New. Guia sa banwa sang Maayon kay ginapunggan nga makarga ang mga gintapas nila nga tubo kag madala sa central para nga magaling.
Sa interview sang Bombo Radyo kay Punong Barangay Liwayway Balpongo, pila na ka adlaw nga wala makaguwa sa ila barangay ang mga gintapas nga tubo kay ginapungan sang mga tinawo ni Eddie Dinglasan.
Suno pa kay kapitana Balpongo nga ginahambalan pa kag ginapahog ang mga Cloa beneficiary nga indi nila pag-araduhon ang ila mga ulumhan apisar nga ini ang gin-award na sa ila sang Department of Agrarian Reform ukon DAR kag may titulo na sila nga ginauyatan sa ginatalauma nga duta.
Dugang pa sini nga nag nagatuga ini sang kahadlok sa mga residente bangud nga nagkuha pa si Eddie Dinglasan sang mga tinawo nga gwardya kag may mga armas para nga magbantay kag magpaandam sa ila.
Bangud sini, nag-request sang mga kapulisan ang mga mangunguma kaupod ang DAR para makita ang ginahimu sa ila sang mga gwardia.
Sa karpn, luyag nila nga mag-untat na ang pagpang harass sang mga ini sa mga mangunguma kay nagapati sila nga lehitimo ang pag-angkon nila sang duta pinaagi sa programa sang gobyerno.
