Isa sa mga ginatudlo nga may kahimuan sa pagpanghigko kag paghalit sa esplanade sa Barangay III, amu ang mga kabataan nga nagatambay sa lugar ilabi na ang mga estudyante.
Sa pagpakig-angut sang Bombo Radyo kay Punong Barangay Nelson Ignacio, ginpahayag sini nga masami nila nga nakikit-an sa lugar ang mga estudyante nga nagikan sa Capiz High National High School, Congressman Ramon A. Arnaldo High School (CRAAHS) sa Barangay Banica kag Tanque National High School.
Suno kay PB Ignacio, tuman ang ila pagkadismaya sa mga ginapanghimo sang mga kabataan bangud imbes sila kuntani ang magabulig kag magatudlo sa kaangay nila kabataan sang maayo nga pagbinatasan sila pa ang nagapanguna nga maghimo sang indi maayo nga butang.
Mahibaluan nga madamo sang mga reklamo ang nakalab-ot sa talatapan sang Punong Barangay angut sa esplanade nga ginahigkuan kag ginawasak pa ang iban nga parte sang pulungkuan kag ginahimo nga basurahan.
Pahayag pa sini nga may yara man sang mga opisyal nga nagalibot sa lugar apang kaangay nga sila lamang ang ginabantayan sang mga kabataan.
Bangud sini, gilayon nga ginhatagan sang aksyon ni Ignacio ang lugar pinaagi sa pagpahamtang sa mga nagabantay kag pagpintura sa mga bangko kag poste nga ginpangsulatan.
Panugyan sini sa mga kabataan nga kuntani dal-on nila sa ila pinsar ang mga ginatudlo nga leksyon kag maayo nga pagbinatasan nga ginatudlo sang ila mga manunudlo sa eskwelahan.
