Ginpakigbahin sang mga opisyal sang Bureau of Fire Protection (BFP) Roxas City ang pila ka mga aktibidad may kaangtanan sa Fire Prevention Month.
Sa interview sang Bombo Radyo kay SFO4 Jesus A. Abucay, Deputy City Fire Marshal kag Acting Chief Operation sang Roxas City, iya ginpahayag nga ang kampanya ang may tema nga “Sa pag-iwas sa sunog, hindi ka nag-iisa.”
Suno kay Abucay, nagakadapat nga kun magluto kinahanglan nga bantayan gid ini agud malikawan ang sunog.
Ginpahanumdom man niya nga indi magpasiga ukon magsunog malapit sa mga hilamon agud malikawan ang grass fire.
Gindayaw man niya ang bulig sang Bombo Radyo sa paghatag sang fire safety tips kag ginpahayag nga pirmi nga nakaalerto kag visible sa dalan ang BFP sa tion sang aksidente ukon sakuna.
Suno naman kay SFO1 Junemar D. Galve, Acting Chief Public Information Unit sang Roxas City, iya ginpahayag nga electrical appliances kag ginpabay-an nga kandila ang nagapanguna nga rason sang sunog.
Nagpanugyan ini nga sa tion sang insidente, indi pag-unahon ang pag-FB live kundi magtawag gilayon Bfp Hotline sa numero nga 09506085228.
Sa bahin naman ni SFO3 Rodelyn A. Soriano, Commander sang Lawaan Fire Sub-Station, iya ginpahayag dapat mangin kalmado kun may gulpi nga sunog agud mahibaluan ang insakto nga dapat himuon.
Padayon man ang ila paghatag sang lecture sa mga kabataan agud madala nila ang ihibalo tubtob sa panimalay.
Samtang Suno naman kay SFO1 Sherryl L. Lavilla, Commander sang Loctugan Fire Sub-Station, iya ginpahayag nga kun may sunog, magtawag gilayon sa BFP kag indi na magbalik sa nagasunog nga balay kon nakagwa na bangud tuman ka delikado.
Ginpahayag man niya nga padayon ang pag-edukar sa mga eskwelahan kag barangay parte sa dapat himuon sa tion sang sunog.
