ROXAS CITY – Nagapadayon ang mga programa sang Local Government Unit (LGU) – Tapaz agud pakigbatuan ang insurhensya, isa na diri ang pagbukas sa mga dalanon sa mga upland barangay sa banwa sang Tapaz.
Ini ang ginkumpirmar ni Tapaz Mayor Roberto ‘Nonong’ Palomar, sang mainterview sang Bombo Radyo.
Suno diri, 3 pa ka barangay ang kinahanglan buksan kag ubrahan sang dalan.
Pinaagi sini, indi mabudlayan ang mga pumuluyo nga magpadulong sa banwa kag magdala sang ila produkto nga makabulig-bulig sa ila pang-adlaw-adlaw nga pangabuy-anan.
Aminado ang alkalde nga nabudlayan ini bangud daku ini nga proyekto, gani tuman ang iya pasalamat sa mga national agencies nga nagpalab-ot sang bulig agud amat-amat nga maangkon ang handum sini nga maayo nga pagpanerbisyo.
Pahayag pa ni Palomar, nga magatinguha pa gid siya agud madugangan ang pondo kag makahimo sang madamo nga programa nga makabenepisyo ang iya mga pumuluyo kag malikawan nga mag-upod sa hublag sang rebelde nga grupo.
Samtang, padayon naman ang pag-engganyo sini sa mga miyembro sang rebelde nga grupo nga magbalik na sa sabak sang gobyerno bangud suno kay Palomar, iba na ang subong nga pagpanggobyerno.
Mga programa agud pakigbatuan ang insurhensya, nagapadayon
-- ADVERTISEMENT --
