ROXAS CITY – Mas o menus isa ka libo ka mga indibidwal gikan sa magkatuhay nga mga progresibo nga grupo ang nag-upod sa ginpatigayon nga rally sa siyudad sang Roxas kadungan sang Labor Day subong nga adlaw.
Suno kay Darlyn Soriga, convenor sang Pan-ay River for Peoples Movement (PRPM), tinutuyo sini amo ang mapakita ang ila hugot nga pagpamalabag sa pila ka mga programa kag proyekto sang gobyerno.
Kadamuan suno sa iya sa mga programa sang administrasyon ni Presidente Rodrigo Duterte ang naga-upang sa pag-umwad sang kabuhi sang mga pigado.
Ginasinggitan man sang mga ini ang ila nga apelar sa gobyerno nga pataasan ang sweldo sang mga mamumugon bangud man sa wala-untat nga pagsaka sang presyo sang mga nagapanguna nga balaklon.
Mahibaluan nga ginsuguran sa isa ka parade ang nasambit nga aktibidad nga ginsundan sang malip-ot nga programa sa Roxas City Public Plaza.
Kaupod sa amo nga aktibidad ang Gabriela, Anak-Pawis, Kabataan, Bayan-Capiz kag iban pa nga kaalyado nga grupo.
