SAPIAN CAPIZ– Nagapanawagan sang aksyon ang pila ka mga residente nga apektado sang ‘blasting’ sa isa ka quarry site sa Poblacion, Sapian, Capiz.
Sa interview sang Bombo Radyo Roxas kay Gilbert Eroy, residente sang Poblacion, Sapian, iya ginpahayag nga bangud sa ‘blasting’ naigo kag naguba ang ila una nga balay.
Suno naman kay Elmer Hamiro, residente man sang nasambit nga lugar, daku ang epekto sang pagpalupok nga ginapatigayon sa quarry site bangud wala na ang matin-aw nila nga suba sadto kag tuman ang yab-ok sa ila palibot.
Ginpahayag naman ni Salbino Ocana, residente man sang amo nga lugar, lapit na 20 ka tuig wala gihapon natuman sang tag-iya ang promisa sa ila nga tituluhan ang 250 square meters nga duta nga ginpahamtangan sa ila sang tag-iya.
Lunsay nagapanawagan ang mga natungdan nga tagreklamo sa tag-iya sang ‘quarry site’ nga tumanon man kun tani ang ginpromisa sa ila kag kay-uhon ang karsada bangud indi lamang sila ang apektado sang ‘blasting’ kundi mangin ang ila mga kabataan nga estudyante.
Nagapanawagan man ang mga ini sa gobyerno nga hatagan sang pagtamod kag aksyon ang ila problema.
Matandaan nga nagpaguwa sang Executive Order No.06 Series of 2025 si Mayor Jose Villanueva sang Sapian agud imbestigaran ang reklamo angut sa pagpalupok sa nasambit nga quarry site.
Nasaad sa amo nga EO ang pagtukod sang taskforce nga magaimbestigar agud matumod kun nagasunod sa pagsulundan ang quarry operation sa amo nga lugar.
In an interview with Bombo Francis Biñas
