ROXAS CITY, CAPIZ- Nakabaton sang bulig pinansyal ang mga residente sang Barangay Butacal, Panay, Capiz nga gin-agyan sang buhawi ang ila nga panimalay sang tinalikdan nga bulan sang Setyembre 2025.
Ang nasambit nga bulig pinansyal ang nagikan sa National Housing Authority (NHA).
Sa interview sang Bombo Radyo kay Mayor Sonny Besa sang Panay, Capiz, iya ginpahayag nga sang amo nga tion nga may nahalitan sang nasambit nga buhawi, gilayon niya ini nga ginpadangat sa talatapan ni Congressman Howard Guintu agud nga mapangayuan sang bulig.
Suno kay Besa, bangud sa iya nga ginpalab-ot nga concern sa talatapan sang nasambit nga Congressman, ginpalab-ot man ini sini dason sa National Housing Authority sa diin kag natigayon nga nahatagan sang bulig pinansyal ang mga naapektuhan.
Nahibaluan nga yara sa 15 tanan ka mga pamilya ang naapektuhan sang nasambit nga buhawi nga nag-agi sa diin nagbaton ini sang nagkalain-lain nga balor: P10,000; P15,000; P20,000 kag P30,000 depende sa kadakuon sang halit nga naangkon.
Nagpasalamat naman ang natungdan sa pagpanikasog ni Congressman Howard Guintu agud nga mapalab-ot sa National Housing Authority ang amo nga concern sa diin nga nahatagan gilayon sang igtalupangod kag madasig nga nabuligan ang mga pumuluyo nga naapektuhan.
Interviewed by Bombo Francis Biñas
