ROXAS CITY – Ginkakibot sang mga residente sa Barangay Lonoy sining syudad ang gulpiyada nga pagtaas sang tubig tuga sang wala untat nga pagbubo sang ulan sang tinalikdan nga Huwebes sa ila lugar.
Suno kay Nelian Alba, residente sang Barangay Lonoy, labing una ini nga natabo sa ila Barangay kun sa diin nagsulod pa ang tubig sa ila puluy-an kag iban pa nga balay kag masobra duwa ka oras antes nahubas ang tubig.
Pahayag ni Alba, tuman ang kataason sang baha ilabi na sa national highway kun sa diin napatay pa ang pila ka mga jeep bangud ginsulod sang tubig ang ila makina.
Ginalantaw sini nga rason sang pagbaha ang drainage sa ila lugar nga puno sang basura kag lutak kun sa diin dugay na nga wala malimpyuhan.
Sa impormasyon nga nakuha, nagpakig-angut na ang ila barangay sa City Engineers office agud maaksyunan ang problema.
