ROXAS CITY, CAPIZ- Nagbaton ang yara sa kabug-usan 141 ka mga senior citizens nga kalakip sa mga Octogenarian (80–89 anyos) kag Nonagenarian (90–95 anyos) sang tag P10,000 nga insentibo nagikan sa gobyerno sa idalom sang Expanded Centenarians Act of 2024 nga ginapatuman sang National Commission of Senior Citizens (NCSC).
Ang nasambit nga programa ang may katuyuan nga kilalahon kag hatagan sang importansya sang mga katigulangan apisar pa nga indi pa ini nagalab-ot sa edad nga 100.
Sa interview sang Bombo Radyo kay Mr. Eddie Dela Cruz, Head sang Office of the Senior Citizen Affairs, iya ginpahayag nga isa ini sa mga pamaagi agud ipabutyag sa mga lolo kag lola nga sila ang kabahin, ginapamatian, ginapalangga, kag matuod nga importante sa sosyudad.
Sa isa ka mamag-an nga bahin sang programa, napamangkot ang pila sa mga benepisyaryo kun ano ang sikreto nila sa malawig nga kabuhi. Simple lang ang ila nga sabat “Kaon lang utan. Utan is the key.”
Nahibaluan nga sa 141 ka mga senior citizen, 64 diri ang naga-edad sang 80, 54 ang naga-edad sang 85, 14 ang naga-edad sang 90,kag 9 ang naga-edad sang 95.
Ang nasambit nga programa ang kabahin sang padayon nga pagpaninguha sang gobyerno nga mahatagan sang suporta kag pagkilala ang mga senior citizens sa pungsod.
With a report from Bombo Francis Biñas
