Nagapanawagan sang bulig ang mga tag-iya sang duha ka balay nga nasunog sa Brgy. Bolo, Roxas City.
Matandaan nga gintupok sang kalayo ang duha (2) ka puluy-an nga ginapanag-iyahan nanday Roberto Clavaton, 55-anyos kag Ruby Elnasin, 52-anyos.
Sa interview sang Bombo Radyo kay tatay Roberto wala sang tawo ang ila puluy-an sang natabo ang sunog bangud ato sila nga magpamilya sa namatyan sa unhan lamang sang ila balay.
Pahayag sini nga ang nabilin nga kandila nga nakabutang sa ila lamesa ang gintunaan sang sunog nga posible nga nasalapay sang ila alaga nga kuring ukon ido kag natumba.
Ginpahibalo lang ini nga nasunog ang ila balay kag sang ginpadulungan sini gintinguhaan pa kun tani nga salbaron ang mga gamit apang wala gid ini sang mahimo bangud daku na ang kalayo. Halos tanan suno diri nila nga mga gamit ang nasunog lakip na ang motor kag ila hinuptanan nga ido kag kuring.
Samtang sa bahin naman ni nanay Ruby nagapasalamat nalang ini nga luwas sila sa katalagman nga magpamilya apisar wala gid sang may nasalbar sa ila nga mga pagkabutang.
Sa karon, temporaryo ang mga ini nga nagatinir sa ila mga himata kag nagapanawagan sang bulig sa mga may bulawanon nga tagipusuon nga luyag magbulig agud may pangdugang sa ila mga kinahanglanon.
