ROXAS CITY – Tuman nga nadismaya si Mr. Jerous Labrador kaupod ang barkada sini nga naglantaw sa Lin-ay kag Hangaway sang Capiz 2024 sang tinalikdan nga gab-i, matapos ang pila ka mga palpak nga natabo sa amu nga event.
Sa interview sang Bombo Radyo kay Labrador, ginpahayag sini nga nagpadulong siya sa venue alas 7:00 sang gab-i kag halos 20 minutos lamang ang ila pagpila kag gilayon man nga nakasulod sa venue.
Suno kay Labrador, sa introduction number pa lang sang mga kandidata kag kandidato wala na ang mga ini nagadululungan nga daw kaangay nagapa-una-una.
Malain man suno diri nga pamatian sa nag-organisa sa amu nga event apang daw nga kaangay nga kalabasa ang nangin performance sang mga kandidata/kandidato.
Na-obserbahan man sini niya ang tuman ka layo nga pwesto sang mga judges kag mas malapit pa suno diri ang pwesto sang mga VIP.
Pahayag ni Labrador nga kun tani ginhatagan sang impprtansya kag pagtamud ang mga judges bangud sila ang may dako nga papel sa amu nga event kag nalikawan kun tani ang paggamit sang ila mga cellphone agud lamang nga makit-an sang klaro ang performance sang mga ini.
Makit-an man suno diri sa mga tumalan-aw nga natak-an na bangud kadugay ang pagpasunod sang pageant kung sa diin madamo pa sang mga extra curricular nga mga indibidwal ang nagperform nga kun sa bagay indi naman kinahanglan bangud nagakaon lamang ini sang oras.
Talalupangdon man suno diri ang gulpi lang nga paghawan sang mga tawo sa venue matapos ang pagkanta sang aktor nga si Ian Veneracion.
Bangud sini, antes natapos ang event partikular sa paglawag sang mga nagdaug ilisipon na lamang ang tumalan-aw.
Mensahe sini nga kun tani magpaguha sang mensahe ang nag-organisa sang amu nga event agud masabat ang pila ka mga palamangkutanon sang tanan ilabi na ang mga tumalan-aw nga nagbayad sang ticket kag dako ang ekspektar.
