Nagpalab-ot sang pagpanginbulahan ang nagkalain-lain nga lider sang pungsod kay Pope Leo XIV.
Kadam-an sa mga ini ang luyag nga makatrabaho si Cardinal Robert Provest sa mga global issues.
Nagpanguna si US President Donald Trump kun sa diin ginpahayag sini nga isa ka makasaysayan ang pagpili kay Cardinal Prevost bangud siya ang una nga American Pope.
Sa gintingub nga pahayag nanday European Council President António Costa kag European Commission President Ursula von der Leyen, nagasalig sila nga gamiton sang Santo Papa ang boses agud mag-isa ang mga pungsod.
Pangabay naman ni Russian President Vladimir Putin nga mag-angkon sang maaypo nga ikaayong lawas ang bag-o nga Santo Papa.
Matandaan nga alas-12:05 sang kaagahon subong nga Biyernes oras sa Pilipinas sang ngguwa ang puti nga aso sa Chimney sang Sistine chapel nga nagapatimaan nga may napilian nga Santo Papa ang 133 nga mga cardinals.
Matapos ang isa ka oras, nagguwa sa balkonahe sang St. Peters Square Basilica si Cardinal Protodeacon Dominique Mamberti agud i-anunsyo nga may bag-o nga napili nga Santo Papa.
Makaligad ang pila ka minutos, nagguwa si Pope Leo XIV kun sa diin ginbayaw sini ang iya kamot sa mga tawo kag nagsinggitan ang ginatos ka libo nga mga tawo nga nagtambong sa pagpili sang bag-o nga Santo Papa.
Sa una nga pahayag sini bilang Santo Papa, gintamyaw niya ang mga tawo.
Sa speech sini, gindayaw niya ang nagtaliwan nga si Pope Francis kag ginganyat ang publiko nga dumdumon ang mga hinimuan sini.
Ginpasalamatan man sang Santo Papa ang kapareho nga cardinals nga nagpili sa iya.
Matapos ang paghambal sini sa lingguwahe nga Italian, nagpahayag man ini sa lingguwahe nga Spanish.
Preparado man suno diri si Pope Leo XIV nga magtindog bilang tulay para sa lapnagon nga paghinun-anon agud maangkon ang kalinong.
