ROXAS CITY – Pilason ang isa ka misis nga ginbuno sang mister sa ila nga balay sa Barangay Bago, Roxas City.
Nahibaluan nga nag-away ang mag-asawa nga sanday alyas Inday, crew sang isa ka pizza store sa isa ka mall kag mister nga si alyas Juan, empleyado sang Capiz Electric Cooperative (Capelco) bangud sa pagpangimon sang lalaki sa biktima.
Sa imbestigasyon sang mga pulis, nagaguwa nga madugay na nga nagaduda ang mister nga may iban nga lalaki si misis bangud atrasado ini kun magpauli sa ila balay kun gab-i
Mas nagbaskog ang pagpati ni alyas Juan nga may iban nga lalaki si alyas Inday bangud ginaalegar nga may nagadul-ong nga motorsiklo sa asawa sa tagsa ka magpauli ini kun gab-i.
Nahibaluan nga sa pag-away sang mag-asawa hinali nga ginkuha sang mister ang kutsilyo kasunod ang pagbuno sa liog kag abaga sang biktima.
Sa karon padayon nga ginabulong sa ospital si alyas Inday samtang nakahunong na sa bilangguan si alyas Juan.
