Isa ka mister sa Krasnoyarsk, Russia, nagaatubang karon sang posible nga pagkakulong pagkatapos nga nakahimo sang isa ka tumalagsahon nga balibad sa paglikaw sa pag-shopping upod sa iya asawa nga nagpakuno-kuno nga ang iya salakyan ginkawat!
Suno sa kapulisan, nag-umpisa ang insidente sang nagtawag sa emergency hotline ang asawa sang naghimo sang krimen agud ireport nga ginkawat ang Toyota Corolla sang iya bana sa ila parking lot.
Apang, wala madugay sang ulihi, ang asawa nagtawag liwat kag nagsiling nga “nakita” nila ang salakyan sa Otdykha Island sa amo man nga syudad.
Sang nag-abot ang mga pulis agud usisaon ang “narekober” nga salakyan, nakita nila ang mga senyales sang pilit nga pagsulod kag isa ka guba nga ignition switch, nga daw nagapakita nga ini ginpilit nga ginbuksan. Apang sang ginapamangkot nila ang tawo, nagduhaduha sila.
Pagkatapos marepaso ang tanan nga ebidensya, nagdesisyon ang mga pulis nga nagabinutig ang lalaki kag ginhimo niya ini tanan. Suno sa mga awtoridad, ang bana “nagpakuno-kuno nga biktima sang carnapping bilang balibad agud makapalagyo sa pag-shopping upod sa iya asawa.”
