ROXAS CITY-Ginhilway na sa karsel sang Roxas City Police Station ang 35-anyos nga mister nga nagpanghostage sang tatlo ka mga indibidwal kalakip ang iya sini nga bata sa Mejorada Subdivison Barangay Inzo Arnaldo Village, Roxas City.
Sa interview sang Bombo Radyo sa kay Police Master Sergeant Ramil Arcangeles ginpahayag sini nga nag-lapse na ang reglementary period of detention sang suspek nga si Randy Ric Alipongan rasun nga ginpaguwa na ini sa presuhan.
Dugang pa sang opisyal nga wala pa mapasaka sang mga kapulisan ang panombongon batuk sa suspek bangud may yara pa sang kulang nga rekesitos nga kinahanglanon agud mapasaka ang panombongon pinaagi sa inquest proceedings sa City Prosecutors Office.
Suno kay Arcangeles nga naatrasar ang pagpaguha sang medical certificate sang duha ka mga biktima.
Mahibaluan nga magapangatubang si Alipongan sang panombongon nga Frustrated Homicide, Trespass to Dwell kag paglapas sa Batas Pambansa bilang anim.
Samtang natalana naman nga pasakaan sang panombongon si Alipongan pinaagi sa regular filling sa maabot nga Lunes nga adlaw.
Mahibaluan nga yara naman sa hilway nga kondisyon ang duha mga biktima nga sanday Enriqueta Batuigas kag Maria Elena Bereber.
