Madinalag-on ang ginpatigayon nga mock elections matapos ang 100 percent nga pagdul-ong ukon transmissions sang simulated votes nga ginpatigayon kahapon nga adlaw, Enero 25 sa 16 ka lugar sa pungsod, suno kay Commission on Elections Chairman George Erwin Garcia.
Buwas nga adlaw sang Lunes, Enero 27, padayunon na ang pag-imprenta sang mga balota, nga pila ka beses na nga na-postponed bangud sang mga ginpaguwa nga temporary restraining order sang Korte Suprema kaangut sa mga petisyon sang pila ka gindeklarar nga nuisance local kag national candidates sang Comelec.
Personal naman nga ginsaksihan kag gin-inspeksyon ni Garcia ang mock elections kahapon sa apat ka clustered precinct sa Sulu.
Nag-angkon suno diri sang malfunction ang makina sa pila ka balota nga gilayon naresolbar matapos gintinluan lamang ang yab-ok. Nagapati si Garcia nga indi mangin palaligban ang mga makina.
