Nakabantay sa karon ang Philippine Coast Guard (PCG) sa ‘monster ship’ sang China nga nasiplatan sang damlag lang malapit sa Luzon.
Ginkumpirmar sang PCG nga una nila nga nakit-an ang presensiya sang ‘monster ship’’ sang China Coast Guard (CCG) ukon sang CCG vessel 5901, yara sa 54 nautical miles ang kalayuon gikan sa Capones Island, Zambales, gamit ang Dark Vessel Detection System sang Canada.
Gilayon naman nila nga ginpadala sa lugar ang BRP Cabra, isa ka helicopter, kag ang PCG Caravan nga amu ang nagkumpirmar takna alas 5:00 sang hapon nga yara sa nasambit nga lugar ang monster ship, nga may kabug-aton sang 12,000 tonelada kag lima ka beses nga mas daku kun ikumparar sa duwa ka pinakamadaku nga barko sang PCG.
Ginhangkat man suno diri sang PCG ang presensiya sang CCG kag ginsilingan nga ang barko sang mga ini ang yara sa exclusive economiczone (EEZ) sang Pilipinas.
Paglab-ot sang alas 8:00 sang gab-i, gin-report nga ang barko ang naglayag na pa-nakatungdan kag ulihi nga nasiplatan sa kalayuon nga 85 nautical miles lamang gikan sa Zambales.
Ginpasiguro naman sang PCG nga magapabilin sila nga committed kag hugot nga bantayan ang amui nga barko agud masiguro nga luwas kag matawhay nga makapangisda ang mga Pilipino sa sulod sang EEZ. Una na nga na-report ang presensiya sang nasambit nga Chinese vessel sa amu nga lugar sang security analyst nga si Ray Powell.
