Narekober ang isa ka unit sang motorsiklo nga ginapatihan gin-chop-chop sa Sitio Silab, Barangay Batabat, Maayon Capiz.
Sa pagpakig-angut sang Bombo Radyo kay Police Major Syril Punzalan, hepe sang Maayon PNP, ginpahayag nga ang nasambit nga motorsiklo ang ginapanag-iyahan sang bata ni Rowena Dequiño residente sa banwa sang Panit-an.
Pahayag sang hepe nga nareport ang namissing nga motorsiklo sadto pang Pebrero 9, 2025 kag sa pagpangusisa sang mga kapulisan ang nasambit nga motorsiklo ang ginbilin sang tag-iya sa guha sang ila kaingud balay.
Nakibot na lamang ang amo nga tag-iya sang natukiban nga wala na sa iya ginparkingan kag wala sang nakahibalo kun sin-o ang nagkuha.
Samtang, sini nga lang adlaw nga may nakita ang isa ka residente sa nasambit nga lugar nga isa ka unit sang motorsiklo nga ginatabunan na sang mga balinghoy kag ginapatihan madugay na nga ginbilin sa lugar.
Gilayon ini nga ginreport sang concern citizen nga nakakita sa mga kapulisan sa amo nga lugar
Narekober ang nasambit nga motorsiklo nga wala na ang iban sini nga mga parts kaangay sang manobela kag guma.
Dugang pa sang hepe nga may yara na sila sang ginalantaw nga person of interest sa may kahimuan sang amo nga insidente.
Sa karon, padayon pa ang ginapatigayon nga imbestigasyon agud matumod na ang may kahimuan sa pagpangchop-chop sa amo nga motorsiklo.
