DUMALAG, CAPIZ – Totally burned ang isa ka motorsiklo matapos nasunog sa Barangay Santo Niño, Dumalag, Capiz.
Ginapanag-iyahan ang amo nga motorsiklo ni alyas Mark nga yara sa legal nga pang-edaron.
Sa interview sang Bombo Radyo kay Fire Investigator SFO1 Aldrin Catalan, iya ginpahayag nga samtang ginamaneho sang driver ang iya motorsiklo padulong sa Santa Cruz, Dumalag, nakaeksperyensya ini sang trouble rason nga iya ini nga ginpapundo kag ginplastar.
Apang sang ginpaandar niya ini liwat kag ginkambya, gulpi lang nagkalayo ang motorsiklo.
Masuwerte naman nga wala ini nasamaran sa sunog bangud nakahalin ini gilayon sang nagdakalayo na ang iya motorsiklo.
Naglab-ot naman sa P7,000 ang kahalitan sang nasambit nga insidente.
Mensahe naman ni SFO1 Catalan sa mga driver nga tsekyaron sang maayo ang mga salakyan agud malikawan ang kasubong nga insidente.
