Nagpahanumdom ang Movie and Television Review and Classification Board (MTRCB) sa tanan nga operators kag drivers sang mga pampubliko nga salakyan ukon Public Utility Vehicle (PUV) nga rated “G” (General Patronage) kag “PG” (Patnubay at Gabay ng Magulang) lamang ang pwede nga ipaguha samtang yara sa biyahe.
Base sa MTRCB Memorandum Circular No. 09-2011, ginkilala bilang common carriers ukon isa ka sinehan na man ang mga PUV bangud nagpaguha sila sang mga pelikula nga sakop sang MTRCB.
Sa idalom sang layi, dapat pwede para sa tanan nga tumalan-aw, partikular sa mga bata, ang mga pelikula nga ginpaguha sa mga pampubliko nga transportasyon.
Base sa Chapter 3, Section 1-3 sang nasambit nga Memorandum Circular, ang mga PUV ang dapat sumunod sa regulasyon kasubong sang mga sinehan.
Ini agud masiguro nga ang mga pelikula ang naayon para sa tanan nga biyahero kag indi magka-negatibo nga epekto sa mga bata nga nagabyahe kaupod ang ila pamilya. Hugot man nga ginpaandam sang Board sa mga PUV operators nga sumunod sa panuntunan ukon magpangatubang sa panumbungon nga magalapas base sa Presidential Decree No. 1986 kag Chapter XIII sang 2004 Revised Implementing Rules and Regulations.
