Nagpaguwa ang Securities and Exchange Commission (SEC) sang bag-o nga memorandum circular (MC) nga nagapasugot sa mga kompanya nga may “delinquent” status nga ibalik ang ila nga good standing.
Sa isa ka statement, ginpahayag sang SEC nga ginlunsyar sini ang Enhanced Compliance Incentive Plan (ECIP) sadtong Agosto 30 pinaagi sa MC No.13 nga nagapanubo sa multa sang mga kompanya nga wala naka-comply sa ila nga annual reportorial requirements.
Ang mga kompanya nga yara sa idalom sang “delinquent” status ang mahimo nga i-settle ang ila nga unassessed ukon unpaid fines kag penalties sa balor nga P20,000 lamang.
Ang mas manubo nga multa kag silot ang mahimo nga i-apply sa mga masunod nga pagbayolar: non-filing sang General Information Sheet (GIS) para sa latest kag prior years; late filing sang GIS para sa latest kag prior years; non-filing sang audited financial statements (AFS), audited ukon certified, kalakip ang multa para sa non-filing sang attachments nga ginapangayo para sa pila nga korporasyon, para sa latest kag prior years; kag late filing sang AFS, kalakip ang multa para sa late filing sang attachments nga ginapangayo para sa pila ka korporasyon, para sa latest kag prior years.
Ang mga aplikasyon ang mahimo nga isumiter tubtob Nobyembre 30.
