ROXAS CITY – Pilason ang tatlo ka mga persona matapos ang nagluntad nga pagbungguanay sang duha ka mga motorsiklo sa Barangay San Roque, Dumalag, Capiz.
Ginkilala ang driver sang Suzuki nga motorsiklo kay Maria Charlene Frias, 42-anyos kag residente sang Brgy. Consolacion.
Samtang, ginkilala ang driver sang Rusi nga motorsiklo kay Rodilo Ferrer, 41-anyos, sakay ang backrider nga menor de edad, mga residente sang Brgy. Sta. Cruz, lunsay sa banwa sang Dumalag.
Sandig sa nangin imbestigasyon sang traffic section sang Dumalag MPS, nga nagasundanay sa karsada ang duha ka mga motorsiklo, sang pag-abot sa nasambit nga lugar, nagliko pawala ang driver sang Suzuki, apang nabungguan ini sang nagasunod nga motorsiklo nga ginamaneho ni Ferrer.
Bangud sini, nagkalatumba ang magtimbang nga motorsiklo kag ginkapilas sang tatlo ka mga sakay.
Ginrespondehan naman sang mga katapo sang Dumalag Response Team kag ginpadangat sa Dao District Hospital si Frias, samtang ang mga sakay sang Rusi ang gindala sa Tapaz District Hospital para sa pagbulong.
Ginkustodiya ang ila mga motorsiklo sa Dumalag MPS.
