ROXAS CITY – Magapangatubang sang patung-patong nga kaso ang apat ka mga kalalakinhan nga nagpakilala mga katapu sang Criminal Investigation and Detection Group (CIDG), Philippine National Police (PNP), Maritime Police kag iban pa nga law enforcement agency matapos nadakpan sa entrapment operation sang mga katapu sang Estancia Municipal Police Station nga nagapatigayon sang extortion activities sa mga sakayan pandagat.
Kalakip sa mga kaso nga ipasaka batuk sa mga suspek nga sanday Richard Obidos 42-anyos, Gerald Balasabas, Eldy Bag-ao kag Angelico Lapitante Jr., lunsay mga residente sang Masbate amo ang extortion ukon pagpangilkil, Usurpation of authorities, paglapas sa RA 9165 ukon Comprehensive Dangerous Drugs Act of 2002 matapos may narekober nga shabu kag paglapas sa 10591 ukon paghupot sang mga armas nga wala sang lisensiya.
Ginpahayag ni Police Captain Niño Leonard Amar, hepe sang Estancia PNP nga madugay na nga may nagareklamo sa kapulisan angut sa ginahimo nga pagpangilkil sang mga suspek sa diin nagplano sang entrapment operation ang kapulisan kag nagkasugot nga sa Poblacion Zone 2, Estancia magabayad ang ila nadakpan nga tag-iya sang sakayan.
Naga-operate ang grupo sang mga suspek sa kalalawran sang Masbate, Carles kag porsyon sang Visayan Sea.
Narekober sa mga suspek ang boodle money nga P62,000, homemade shotgun, nga may bala, tatlo ka sachet sang shabu kag cellphone.
Ginkostodiya man sang kapulisan ang nagaduag puti nga sakayan pandagat nga may pangalan nga pulis CIDG nga ginagamit sang mga suspek sa pagpangilkil.
Kabahin sang modus sang grupo sang mga suspek ang pagpamahog, pagsaka sa mga sakayan nga ila maagyan sa kalalawran.
Nahibaluan nga sa sakayan pa lamang ila na ginatransaksyon ang tag-iya sang fishing boat.
