ROXAS CITY – Magapangatubang sang kaso nga robbery-extortion ang 25-anyos nga nagpakilala nga ahente sang Philippine Drug Enforcement Agency (PDEA) nga nagapangilkil sa pamilya sang isa ka drug surrenderer sa Barangay Bago Chiquito, Panay, Capiz.
Sa entrapment operation nga ginpatigayon sang pulisya naaresto si Depee Dorado anay confidential agent sang CIDG-Capiz samtang nakapalagyo ang kaupod nga si Melvin Bacuta nga ginatudlo nga utok sa pagplano sa nasambit nga pagpangilkil sa pamilya Burgos.
Nagsugod ang transaksyon sang estoryahon sang mga suspek ang pamilya ni Roy Burgos kag pangayuan sang P100,000 kabaylo sang indi pagserbe sang warrant of arrest sa ila nga himata
Bangud indi masarangan sang pamilya ang ginapangayo nga kantidad nag-ayo sila tobtob nakalab-ot sa P40,000.
Apang antes ginhatag ang kuwarta, nagkunsulta ang pamilya Burgos ang kilala nga pulis rason nga ginpatigayon ang entrapment operation.
Nagtuyo pa nga magpalagyo si Dorado, apang wala na ini nakadalagan bangud sa madamo nga pulis sa palibot.
Wala sang armas nga nakuha sa suspek apang nakuha lamang diri ang cellphone, cash kag mga ID’s kasubong sang lambat sibat id kag driver’s license.
