Ginpamatbatan sang 90-day preventive suspension sang National Police Commission (NAPOLCOM) ang 12 ka mga pulis nga naulamid sa kaso sang mga nadula nga manugbulang.
Suno kay NAPOLCOM Commissioner Vice Chairperson and Executive Officer Atty. Rafael Vicente Calinisan, nabaton na ni Philippine National Police (PNP) Chief PGEn. Nicolas Torre III ang nasambit nga resolusyon kun sa diin nakasaad man diri nga ini ang epektibo gilayon.
Ang resolusyon, ang kaangut sa gihapon sa gin-file nga mosyon sang whistleblower nga si Julie “Dondon” Patidongan ukon alyas ‘Totoy’ batok sa mga nasambit nga pulis nga nakit-an sang probable cause bangud sa ‘strong evidence of guilt’.
Kalakip naman sa mga respondents sini amo sanday PLtCol. Ryan Jay Orapa, PMaj. Mark Philip Almedilla, PCol. Jacinto Malinao Jr. kag iban pa nga mga pulis.
Nakasaad man sa resolusyon nga nakitaan sang komisyon sang ‘substantial legal and factual basis’ ang ila nga nangin pagdampig kag pagpahanugot sa gin-file nga mosyon ni Patidongan.
Samtang, apisar implemantado na ang resolusyon, gin-athag ni Calinisan nga ang pagguha sini ang wala nagakahulugan nga may yara sang kahilabtani ukon matuod na nga nakasala ang mga naulamid nga pulis.
Indi man suno sa iya ini nga isa ka silot kag gin-athag nga kabahin ini sang proseso sa imbestigasyon agud masiguro nga indi maimpluwensyahan ang ongoing investigastion sang komisyon kaangut sa kaso sang missing sabungeros.
Sa karon, yara na sa kustodiya sang Department of Justice (DOJ) ang duwa ka utod ni Patidongan nga sanday Elakim kag Jose Patidongan kun sa diin madumduman nga ginkumpirmar ni Elakim nga handa siya mag-testigo kag ipakigbahin ang iya mga nahibaluan kaangut sa pagkadula sang mga manugbulang.
