ROXAS CITY, CAPIZ – Nagpasalig ang incoming Regional Director sang National Commission of Senior Citizens-Western Visayas nga indi ini magatinir lang sa iya opisina sa baylo magalibot sa mga probinsya agud hibaluon ang kinahanglanon sang mga katigulangan.
Sa interview sang Bombo Radyo kay Ms. Ann Rapunzel ‘Rara’ Ganzon, una nga Regional Director sang nasambit nga talatapan, iya ginpahayag nga anad siya sa pagbisita sa grassroots level sa nagkalain-lain nga Local Government Units sa diin magaistorya ini sa mga Local Chief Executives agud makapangayo sang suporta sa nagakalain-lain nga programa nga para sa mga senior citizens.
Pinaagi sa iya liderato suno sa iya, tinguhaan niya nga ma-facilitate ang access sa serbisyo sang mga katigulangan sa rehiyon 6.
Magapakig-angot man si Ganzon sa mga stakeholders agud makasuporta sa social inclusion.
Ginpakigbahin man sini ang duha ka mga banner programs nga naumpisahan na kag ini amo ang Expanded Centenarian Act kag Senior Citizen Community Center.
Si Ganzon ang nangin Social Welfare Office IV kag focal person sang Iloilo Provincial Social Welfare and Development Office (PSWDO) sang Iloilo Provincial Government.
Siya man ang ginpasidunggan bilang Presidential Lingkod Bayan Award — ang pinakamataas nga pagkilala ukon kadungganan nga ginhatag sa public servants para sa ila exceptional contributions.
