ROXAS CITY – Nagapadayon pa ang pagkuha sang biometric information nga gina-require para sa national ID.
Ini ang ginpahayag ni Engr. Franky Dordas, Provincial Statistics Officer, sang ma-interview sang Bombo Radyo Roxas.
Suno kay Dordas, nga limitado nalang nga pamaagi bangud madamo na sang nakakuha sang nasambit nga ID kag yara na sa kapin 500,000 ang nakarehistro diri sa probinsya sang Capiz.
Gin-athag man sini nga indi sang Philippine Statistics Authority (PSA) ang nagapanagtag sang national ID bangud pagkatapos sang registration ini ang ginapasa sa Bangko Sentral ng Pilipinas (BSP) kay ini ang naga-imprintar sang mga ID kag igapasa naman sa Philpost agud sila ang maga-deliver.
Ginpahayag man sini nga malapit na sa 55 milyon ang mga nakarehistro nationwide kag yara palang sa 16 milyon ang mga narelisan na sang ID. Sa karun nga 2022, ginatinguhaan sang PSA nga marehistro ang mga naga-edad lima ka tuig pasaka.
