ROXAS CITY – Nangin madinalag-on sa kabug-usan ang ginpatigayon nga 2nd quarter National Simultaneous Earthquake drill kahapon sa diin nangin pilot school ang Panit-an National Highschool.
Ginpahayag ni Mrs. Judy Grace Pelaez, Provincial Disaster Risk Reduction and Management Officer nga ba-se sa nangin assesstment sang mga evaluators nga nagpakigbahin sa nasambit nga aktibidad nga daku ang nangin improvement sa mga partisipante sang amo nga buluthuan.
Apisar may pila ka mga estudyante nga naglain ang pamatyag samtang ginapatigayon ang amo nga drill, apang ini ang minimal lamang kumpara sang nagligad nga tuig.
Epekto ang hyperventilation suno kay Pelaez sang tuman ka init nga panahon, kakapoy, kakulba kag excitement.
Nahibaluan nga nagdangat sa 28 ka mga partisipante ang naglain ang pamatyag sa earthquake drill sa Panit-an National Highschool, 20 sa Capiz National Highschool, walo sa Comissioner Luis Asis National High school sa banwa sang Panay, anum sa Ivisan kag may yara man sang narekord sa banwa sang President Roxas kag Tapaz.
Samtang malipayon si Pelaez sa nangin resulta sang drill kag nagapati nga preparado na ang tanan kag nahibaluan na ang dapat nga himoon pananglitan may magluntad nga kalamidad kasubong sang linog.
