Naka-alerto sa karun ang National Disaster Risk Reduction Management Council (NDRRMC) kadungan sang pagpanalasa sang Bagyong Kristine.
Suno kay NDRMC Spokesperson kag Office of the Civil Defense (OCD) Director Edgar Posadas ang pagpaidalum sa red alert status sang ahensiya agud masiguro nga natutukan ang mga kinahanglanon sa mga lugar nga tuman naapektuhan sang Bagyong Kristine.
Mahibaluan nga yara na sa Philippine Areas of responsibility (PAR) ang Bagyo rason nga kinahanglan nga matutukan ang mga kinahanglanon sang publiko.
Sa monitoring sang NDRRMC, sumampa naglab-ot na sa 10 ang casualties sang Bagyong Kristine base sa ginapatigayon nga validation.
Samtang, yara sa masobra 431,000 pamilya ang apektado sang bagyo nga nagikan sa 12 ka rehiyon kung sa diin temporaryo nga nagatinir ang mga ini sa 4,567 evacuation centers.
Naglab-ot naman sa 7 ka rehiyon ang apektado sang lapnagon nga pagbaha.
Ginkumpirmar naman ni Transportation Secretary Jaime Bautista nga bukas na ang pila ka mga hulugpaan sa Bicol region.
Partikular sa Daraga, Virac, Masbate kag Naga kag mahimo ini nga gamiton para sa air transport para sa mga relief goods.
Ginsiguro naman ni Bautista nga may mga CAAP personnel sila nga naka-standby agud mag-assist panaglitan nga may yara sang flights.
Ang Bicol region ang tuman nga naapektuhan sang Bagyong Kristine.
Ginsiling naman sang Philippine Ports Authority nga yara sa masobra 7,000 pa nga mga pasahero ang stranded bangud sa bagyo.
