Nagdangat na sa 38 ka mga indibidwal ang kumpirmado nga ginbawian sang kabuhi bangud sa epekto sang Habagat kag mga tropical cyclones nga sanday Crising, Dante, kag Emong, suno sa National Disaster Risk Reduction and Management Council (NDRRMC).
Sa numero nga ini, tatlo nga napatay ang nakumpirma na kag 35 pa ang sa karon gina-imbestigaran. Ang mga napilasan naglab-ot sa 33 — 24 diri ang nakumpirma na, kag siyam pa ang sa karon gina-imbestigaran.
Samtang, ang mga nagkaladula naglab-ot sa walo — apat ang nakumpirma kag apat pa ang sa karon nga gina-imbestigaran.
Ang numero sang mga apektado sang mga nasambit nga kalamidad ang naglab-ot sa 2,365,343 nga pamilya ukon kabaylo sa 8,592,630 nga tawo. Sa numero nga ini, 24,771 ka pamilya ukon 91,906 nga indibidwal ang nagapabilin sa 839 nga evacuation centers, samtang 32,320 nga pamilya ukon 123,624 ka tawo ang yara sa guwa sang mga evacuation centers.
