ROXAS CITY -Ginapreparahan na sang Archdiocese of Capiz ang liwat nga pagpatigayon sang misa sa mga simbahan sa probinsiya kasunod sang pagpapasar sang resolusyon sang Inter-Agency Task Force on Emerging Infectious Diseases (IATF-EID) nga nagpasugot na sa mga religious gatherings sa mga lugar sa ginpaidalum sa Miodified General Community Quarantine (MGCQ).
Ini ang ginpahayag ni Rev. Fr.Jose Arturo Emilio Arbatin, spokesperson sang Archdiocese of Capiz sang mainterview sang Bombo Radyo.
Apang sa karon suno kay Arbatin nga wala pa sang may nabaton nga direktiba gikan kay Archbishop Jose Advincula Jr. ang mga kaparian natuhoy sa pagpatigayon sang religious gatherings.
Bangud diri, suno kay Arbatin magapabilin nga wala sang religious gatherings sa bilog nga Archdiocese of Capiz.
Apang ginpahayag ni Arbatin nga sa pihak nga wala pa sang direktiba, ginapreparahan na sang mga kaparian ang “new normal” sa pagbalik sang mga religious gatherings.
Ginpahayag ni Arbatin nga hugot nga ipatuman ang minimun health protocols
sa sulod kag sa guwa sang simbahan.
Suno kay Arbatin nga hugot nga ipatuman ang 2 meters nga social distancing sa diin magapahamtang sang marker sa mga pulungkuan sa sulod sang simbahan.
Gindugang pa sini nga magapahamtang sang footbath area kag disinfection area sa diin tanan nga magasimba ang ipaidalum sa thermal scan antes magsulod sa simbahan.
Hugot man nga dumilian ang paghalad sa misa kag ipatuman ang pagsuksuk sang facemask.
Samtang magapabilin nga prayoridad kag ipatuman ang minimum health protocol sa iban nga mga religious gatherings kasubong sang kasal, lubong, bunyag kag iban sa diin ginalimitahan ang mga magatambong sa nasambit nga mga religious gatherings.
