Handa nga magbulig ang National Food Authority (NFA) para lagson ang mga nagapamintaha nga rice traders sa punsod, suno kay NFA Administrator Larry Lacson.
Sa ika-apat nga State of the Nation Address (SONA) ni Presidente Ferdinand Marcos Jr., ginpasigurado sini sa Department of Agriculture (DA) nga mabantayan ang mga trader halin sa posible nga pagpamintaha sa mga mangunguma kag pagmanipula sa presyo sang bugas kag humay.
Suno kay Lacson, ang matigdas nga pahayag ni Presidente Marcos batok sa mga trader ang pamatuod nga ginapamatian sang gobyernmo ang mga ginasinggitan sang mga mangunguma.
Nakahanda man suno sa iya ang NFA nga magbulig sa DA kag iban pa nga ahensiya sang gobyerno para isulong ang mga kampaniya kontra sa mga mapamintaha nga mga trader kag dalayon nga mapasabat ang mga ini agud proteheran ang mga mangunguma.
Ginsiling sang opisyal nga ang nagapanguna nga katuyuan sang NFA amo agud proteheran ang kinamatarong sang mga mangunguma.
Suno sa iya, ang mga ini ang matuod nga haligi sang seguridad sa pagkaon sa pungsod, kasubong sang ginahatagan igtalupangod ni Presidente Marcos sa iya nga nangin speech.
Samtang, nagapanindugan si Lacson nga indi man sang insigida ang solusyon nga ginahimo sang NFA kag DA, lauman sa gihapon sang mga mangunguma nga tinguhaan sang ahensya ang pag-ayos kag pagbag-o sa sektor sang pagpanguma kalakip na ang pagpasabat sa mga nagapangmanipula nga trader.
