Yara na karon sa Barangay Quarantine Facility sa Barangay Punta Tabuc, sining syudad ang nobya sang nagpositibo sa COVID-19 nga si alyas Santos.
Mismo ang iloy ni Renalyn nga si Lady Biernesto ang nagtugyan sa iya anak sa mga opisyales sang barangay agud mapaidalum ini sa quarantine.
Ginkuha man sang ginang ang kahigayunan nga ma-interview sang Bombo Radyo agud maklaro ang pila ka mga bagay angut sa alegasyon sang iban nga magkaupod ang iya anak kag si alyas Santos kasunod sang pagpalagyo sini sa hortus botanicus.
Ba-se sa panaysayon sang ginang nga nagbiya sa ila balay si Renalyn para magbakal sang bulong, apang sa pagbalik, indi na siya pagpasudlon sa ila lugar sang iban nga mga residente sa pagpati nga nagkita kag nagkaupod sila ni Santos nga COVID-19 positive.
Bangud diri nagpadulong na lamang sa balay sang iya abyan ang dalaga.
Aminado man ang ginang nga madamo sang barkada kag palalagaw ang iya anak sa diin sa sulod sang duha ka adlaw nga wala pagpauli sa ila balay nakapadulong siya barangay Tanza, Tiza kag Panay.
Ginapanindugan sang iloy ni Renalyn nga wala nagkita ang iya anak kag si Santos bangud pamatood diri ang text/chat sa cellphone nga subong kuntani nga adlaw sila magakit-anay apang matapos nahibaluan sang lalaki nga nakapauli na ang dalaga, nagpamat-ud ini nga mapadulong na lamang sa Barangay Hipona kag liwat nga magabalik sa Iloilo.
Nahibaluan pa nga gintinguhaan ni Renalyn nga makapauli sa Barangay Punta Tabuc agud matinluan ang iya pangalan batuk sa wala kamatuoran nga espekulasyon.
Handa man nga magpaidalum sa swab test ang ginang pananglitan magpositibo ang anak.
Matandaan nga nangin alerto ang pamunuan sang Barangay Punta Tabuc matapos naglapat ang report nga nakit-an nga magkaupod sanday Santos kag Renalyn.
Nabalaka lamang ang mga opisyales sa barangay sa peligro nga mahimo madala sang dalaga sa ila barangay kun magpauli ini bangud nagkaupod sila ni Santos nga isa ka covid-19 positive.
